ძველი ეგვიპტის კულტურა

მსოფლიოს ერთ-ერთი უძველესი- ეგვიპტური ცივილიზაცია ჩაისახა ჩრდილო-აღმოსავლეთ აფრიკის ტერიტორიაზე, მდინარე ნილოსის დაბლობში. თვლიან რომ სახელწოდება "ეგვიპტე" მომდინარეობს ძველი ბერძნული სიტყვიდან "აიგუიპტოს", რომელიც თავის მხრივ აღმოცენდა ქალაქ ხეტ-კაპტახის სახელწოდებიდან, რომელსაც მოგვიანებით ძველი ბერძნები მემფისს უწოდებდნენ. თვით ეგვიპტელები თავიანთ ქვეყანას "ტა კემეტათი" მოიხსენიებდნენ, რაც შავ მიწას ნიშნავს ადგილობრივი ნიადაგის ფერის მიხედვით.
ძვ.წ. 5 000 წელს პალესტინიდან და ნუბიიდან გადმოსახლდნენ უცხო ტომები და დასახლდნენ ნილოსის ნაპირთან. ამაღლებულ ადგილზე მათ ააშენეს დაწნული ქოხები, მოიშინაურეს ცხოველები, მისდევდნენ მესაქონლეობას, ასევე სოფლის მეურნეობას. ეს ადამიანები გახდნენ პირველი ეგვიპტელები, რომლებმაც სათავე დაუდეს ამ უძველეს ცივილიზაციას.
ცოტა თუ მოიძებნება მსოფლიოში გამქრალი ცივილიზაციების ძეგლები, რომლებიც ისეთი საიდუმლოებით იყვნენ მოცულნი და ადამიანებში ისეთი მოწიწების გრძნობას იწვევდნენ, როგორც ძველი სამეფოს ეგვიპტური პირამიდები. "ადამიანს ეშინია დროის, ხოლო დროს პირამიდების", ამბობს არაბული ანდაზა. კაცობრიობისთვის ცნობილია ყველა ეგვიპტურ პირამიდაზე უძველესი ფარაონ ჯოსერის პირამიდის შემქმნელის სახელი, მას იმჰოთეპი ერქვა. მისი სახელი ისტორიას შემორჩა როგორც არა მარტო ხუროთმოძღვრის, არამედ ექიმის, ასტრონომის და ბრძენი კაცის სახით. ჯოსერის საფეხურებიანი პირამიდა, უდაბნოს ქვიშნარში, ზეცისკენ აღმართული კიბის შთაბეჭდილებას ტოვებს. იგი 60მ. სიმაღლისაა, მისი ზედა ნაწილი თანდათან ვიწროვდება. ეს ის პერიოდია, როცა საშენ მასალად აქტიურად იყენებენ ქვას, რითაც აგებდნენ ფარაონთა აკლდამებს. ასევე იყენებდნენ: გრანიტს, დიორიტს და ალებასტრსაც კი.
ძველი ეგვიპტელების ყოფა-ცხოვრების შესახებ ბევრ რამეს მოგვითხრობენ მუმიები, რომლებიც ძველმა ეგვიპტელებმა თითქოს ანდერძად დაუტოვეს დანარჩენ მსოფლიოს. მუმიათა საფუძველზე მეცნიერებმა დაადგინეს, რომ ძველ ეგვიპტეში ადამიანი ცხოვრობდა 35-40 წელი.
დიდია ეგვიპტის ცივილიზაციის მნიშვნელობა, რომელმაც კაცობრიობის ისტორიაში ღრმა კვალი დატოვა. ცხოვრების ყველა სფეროში თავისი მიღწევებით ეგვიპტემ დიდი გავლენა მოახდინა მეზობელ და უპირველეს ყოვლისა წინა აზიის მოსახლეობაზე...







http://www.youtube.com/watch?v=GaInDIv3-V8
http://www.youtube.com/watch?v=Bly2IMV08Co
http://www.youtube.com/watch?v=2nLcJH972Sk